空海 (Closed)

就快到紀念日，想同另一半好好慶祝一下。不過今年嘅紀念日喺平日，大家返工都忙，所以提早咗，響之前嘅週末慶祝。兩個人都鍾意食日本嘢，今次揀咗喺旺角嘅空海食晏晝飯。餐廳喺廣華街嘅地舖，最搶眼唔係舖頭名，而係招牌位置，大大隻又立體嘅蟹，第一眼以為自己已經去咗日本。門口已經擺咗餐牌，不過字體比較細，行埋啲先睇得清楚。唔單止門口餐牌嘅字比較細，連餐廳面積都係，一共只係得八個座位，建議訂位穩陣啲。餐廳提供唔同嘅套餐，亦有散叫。今日揀咗松葉蟹甲羅燒定食。前菜係豆腐，加咗芝麻醬同埋蝦乾，味道香濃，凍食豆腐又好啱呢個天氣。味噌湯加入咗蟹肉，令味增湯不再平凡，海產香味就夠吸引。輪到戲肉松葉蟹甲羅燒，係將個蟹殼伴入非常豐富嘅蟹膏，然後燒熱。熱辣辣嘅蟹膏更加甘香，伴著白飯享用，更夠滋味。由於定食套餐唔包飲品，另外叫咗一杯巨峰提子梳打，甜美享受，亦好啱而家比較熱嘅天氣享用。