黑木亭居酒屋 (清風街) (Closed)

天后開咗間充滿日本風情食物質素又高嘅居酒屋🇯🇵凱撒海鮮沙律甚有fusion嘅味道，凱撒沙律醬夠香，食落好開胃，特別嘅係佢加咗蟹籽、蟹肉、蝦同埋帶子，令普通嘅凱撒沙律變得好豐富。明太子雞肉串上碟時已經聞到好香嘅炙燒味，雞肉好腍，明太子沙律醬鹹香，兩者非常夾。甲羅燒味道濃郁充滿鮮味，撈埋之後食到粒粒蟹子同蟹肉嘅口感，配多士食感覺就冇咁漏。油甘魚刺身食得多，原來燒魚鮫一樣咁好味－魚鮫只有大骨好易食，啖啖魚肉唧上檸檬汁再點柚子醋更突顯魚油香。依份牛肉他他真係好驚喜！一片片嘅和牛入口即溶，有別於切粒嘅牛肉他他，反而更食到和牛嘅油香，連埋蒜片、葱花、蘿蔔蓉同洋蔥絲一齊食又係另一種滋味。最後嗌咗杯好得意又有心思嘅蜜桃烏龍熊茶，熊熊其實係烏龍茶冰嚟，就算溶咗都唔會令飲品變淡，蜜桃味唔會過甜，可以解膩。