鮨玥 (Closed)

去西灣河探朋友，之後佢帶我去左間日本菜餐廳，估唔到可以咁高水準。位置就近西灣河的海旁，及碼頭。先點了小食, 入口卜卜脆的鳕魚干，餸啤酒一流。另一特色小食，柚子醋清真鱈白子, 向來小食內臟，但師傅夾了柚子醋，蘿蔔蓉，遮蓋了腥味，又帶出魚鮮味，入口香滑。串燒叫了燒牛舌， 厚有, 薄又有，厚的牛舌味濃，薄的爽口。一夜干燒至皮脆，刀功非常好，中間條骨都劏開一半，肉質結實鮮甜，配上蘿蔔蓉酸汁，好好味。本鮪壽司盛有大拖羅、中拖羅及赤身壽司，每塊魚都切得好厚, 赤身壽司味道清香，質地較實, 中拖羅油脂夠，大拖羅入口即溶，鮟鱇魚肝壽司，好特別，未試過咁食，好香濃，原來唔腥，而且味道好像午餐肉味，夾埋蘿蔔蓉，同蔥花，好香。