釜之魂釜飯專門店 (淘大商場) (Closed)

呢間野啱啱開張嘅時候好多人排隊，嗰陣一直都好想試但係咁多人排隊就不了。最近諗起呢間野，特登約朋友平日一齊食。餐牌上面款式選擇不多，咁有可能係餐廳為咗保持食物質素所以款式比較少。首先我哋叫咗個鰻魚肝，因為睇過食評有好多人都讚鰻魚肝好食。一小碟鰻魚肝份量唔算太多，有七至八個肝。鰻魚肝味道甘香，加上餐廳特製燒汁同埋姜蓉，更加突出到鰻魚肝嘅鮮味。嚟到呢度當然一定要食鰻魚飯，我同朋友叫咗一個燒鰻魚（魚尾）釜飯。雖然係魚尾部份，但係肉身厚，鰻魚好大塊，可以見到米係用珍珠米，珍珠米比較有咬口，會令到個飯更好食。呢個飯不論係鰻魚肉，燒汁，野菜，米飯，就同喺日本食到嘅鰻魚飯一樣👍🏽我哋仲叫咗個燒雞扒飯，燒雞扒同碗一樣大塊，米亦都係用珍珠米。雞扒肉厚身，有陣陣燒香味。我哋另外叫咗兩款小食，第一款黑松露醬燒玉子。厚燒玉子上面有少少沙律醬，玉子入邊混合左甜味雞湯，果然係日式燒玉子。第二款係雞翼，雞翼外脆內嫩，雖然係炸雞翼，但唔會太油亦都唔會太鹹。總括來講食物方面真係同喺日本食到嘅好似，服務員嘅質素都唔錯，例如會好貼心咁叫我地趁熱食魚肝。假如再經過，又或者平日得閒會再過嚟食。