新志記海鮮飯店 (Closed)

中午大約一點幾響太子區揾食唔係咁易，諗住都係要幫襯快餐店，一出地鐵經過呢間食肆，望一望發現有位噃，咁就唔駛諗立刻入嚟。出乎憲意外，午飯時間竟然無乜人，連裡面個廳都無開，同夜晚要大排長龍真係有天壤之别。午餐主要提供粉麵飯及燒腊，當然小菜亦有供應，午餐送例湯由最平$25至$50都有，視乎你想食乜，最平嘅三寶飯及花生炆豬手睇落都幾正。本來想叫波蘿咕嚕肉但見到同檯都有人食呢味，個樣好唔對辦，似係預早整定，有一大pat汁而且D咕嚕肉肯定係淋嘅。唯有叫咗碟生魚片飯($28)，例湯先到，霸王花煲豬肉無落味精味道清甜，連渣都食埋，碟飯係即做要等咗一陣至有得食，生魚片有鮮味，更有好多菜一齊炒幾健康。環境就一般亦坐得好逼，不過食物有一定水準，仍然值得捧場。