匡樂冰室 (Closed)

約咗人入元朗行山，早咗到，即刻把握時間，行去匡樂冰室食返個早餐。冰室嘅早餐一般大同小異，呢度都唔例外，稍為特別嘅係有一系列甜豆（即茄汁焗豆）餐供應。叫咗個英式焗甜豆扒餐，除咗甜豆同多士係穩膽外，我仲揀咗吉列魚柳，炒蛋同埋腸仔。首先要讚嘅係杯凍檸茶，檸檬有成五，六塊，好重手，茶味亦夠濃。食物方面，魚柳大大塊，炸得香脆熱辣，雖然係雪藏嘢，不過魚肉都尚算軟滑，唔錯；炒蛋就更出色，嫰滑有蛋香，上枱時仲有蛋汁流出，好食👍；腸仔正常味道；主角甜豆現成嘢，唔會難食得去邊，佢嘅甜味正好中和炸魚柳嘅熱氣，食完啲茄汁仲可以用嚟點魚柳🤗。唯一塊多士烘得唔夠，要扣啲分。