令和居酒屋

Open Now

Now Closed

旺角真係超級多餐廳，要喺芸芸餐廳中突圍而出，真係唔係一件容易嘅事。呢間餐廳就用咗一個出眾嘅外觀去吸引人，喺街度行過好容易俾佢吸引到目光。我就係俾佢嘅外觀吸引咗入去食晚飯，入到去之後嘅環境都好日式，因為時間比較早，人都唔係好多，所以坐得都幾舒適。四色刺身盤三文魚、吞拿魚、赤蝦、帆立貝。最出色都係赤蝦，冇雪藏味道，亦都好大隻。第二隻係帆立貝，雖然細細隻，但係都好鮮甜。北海道魷魚一夜干魷魚好惹味，配上沙律醬係絕配。而且燒得啱啱好，唔會好乾好難咬。令和玉子燒厚厚嘅玉子燒，除咗有雞蛋嘅味道，仲有輕微嘅甜味，而且佢嘅溫度啱啱好，入口時仲熱辣辣。堂煮壽喜燒-M6澳洲和牛200g嘅和牛份量真係足夠，望落去雖然油花唔係好靚，但係食落口一啲都唔韌，而且仲好有牛味。壽喜燒湯底一開始淡淡地，但係煮晒所有嘢食之後，濃郁嘅香味即刻浮現出嚟，忍唔住飲晒全部湯。壽喜燒鍋蔬菜嘅份量都唔少，吸咗濃郁嘅湯更加美味。菠蘿乳酸梳打+荔枝乳酸梳打兩杯飲品冰冰凍凍，果香味唔會太過人工添加劑。而且佢嘅乳酸味好濃郁，梳打都好夠氣。總括呢間餐廳都唔錯！！而家天氣開始涼，食個壽喜燒暖笠笠都係一個唔錯嘅選擇。下次再食可以試吓佢個牡蠣鍋。