糖佰府 (Closed)

0係九龍城食糖水，心入面都係果幾個選擇。點知今日行行下，竟然比我發現另一間唔多起眼既小店。我同朋友仔都比店入面特別既環境吸引左入去，店內既格調好清新好繽紛。牆都係以鮮色為主，貼滿左好多甜品既相片。我地坐低後一睇餐牌，價錢令我地好驚喜。雖然座落旺區，但價錢係小區街坊價，而且選擇唔少。我地四個人，但係叫左五樣野食，每人一碗加一個綿花冰。《法式燉蛋》我唔想食凍野，揀左法式燉蛋。上枱時熱辣辣，好香！輕輕篤落去，面頭有少少焦糖，燒得好脆好成功。試一啖燉蛋，好滑好creamy，口感一流。味道方面，有好香濃既蛋香，少少甜，仲有少少香油味，味道豐富有層次。《椰汁冰紅豆芋圓西米》啊妹不嬲鍾意食芋圓，去親台灣都食唔停。香港唔多地方有得食芋圓，佢一見到就好開心喇。呢度既芋圓好足料，有好多唔同既配料，一d都唔單一。試左一啖，芋圓好Q彈，西米爽滑，最特別係佢地配左少量椰汁冰，令到口感又多左一個層次。《番石榴綿花冰》綿花冰冰涼軟綿綿，但一定要快食，溶左又唔好食喇。番石榴味道突出，配料足，鍾意食冰野既話，算係唔錯既選擇。整體黎講，選擇多，用料足，味道唔錯，價錢非常相宜。服務環境都令人覺得舒服，值得一去。