呢度環境都好大，侍應安排了卡位給我們，卡位好寛敞，我們坐好後，周圍望，原來呢度做緊啲優惠，食滿$300就可以免費有滷水拼盤送，我地有四個人，可以有個中既滷水拼盤，我地睇完餐牌都好快點好菜。
1
小菜來到，第一碟係滷水鵝片，鹵水味啱啱好，唔鹹，份量都算適中，鵝片唔肥，食多幾件都唔怕肥！
滷水拼盤，入面有墨魚，紅腸，鵝腸，滷水豬肉片，豬腸，豬耳，芽菜等，墨魚唔靱，鵝腸好爽脆，滷水豬肉片肥瘦得宜，豬耳爽脆，豬腸都好好食，唔會食到有臭味。滷水一樣唔鹹，味道剛剛好！
蠔仔粥，我地有四個人，所以叫左個大的蠔仔粥，蠔仔份量都唔少，粥底冇出面坊間的咁鹹，感覺冇味精，粥底用上方魚做湯底，好鮮味！
燒汁脆牛腩，切到一片片，邊位炸得好脆口，入面牛腩好有牛味，份量又夠多，點埋個醬真係好好食，我都不其然咁食左好多件！哈哈！！
石鍋啫啫芥蘭，用石鍋盛載令芥蘭不失溫度，芥蘭好爽脆，好青綠，好新鮮，味道好惹味，份量都好多，送飯一流！
潮州凍馬友，魚肉都好肥美，凍食我都是第一次，原來馬友凍食都可以咁好食，入口甘香，魚肉順滑鮮味，成日都食烏頭，今次食馬友都不錯選！
煎蠔烙不嬲都係食潮州菜的不二之選，所以我唔會錯過。蠔烙煎得好乾身，好脆，唔油，入面好多蠔仔，粉醬多左少少，但味道都做得唔錯，點埋魚露真係回味無窮！
雪裡紅鮮竹茄子，呢個菜真係好驚喜，鮮竹同茄子用上雪菜炒，雪菜唔會鹹，唔會搶走茄子同鮮竹味，但鮮竹吸晒雪菜的味道，鮮竹仲應該用油炸過先炒，所以食落會食到鮮竹脆脆感覺，茄子好腍，好入味，一個字＂正＂
在旺角食潮州菜通常都會在地舖一啲小菜館，今次第一次去這些大舖食，仲要係一個旺角地方，環境同衞生都比其他街舖好，侍應好有耐心解釋菜色，同朋友聚舊真係冇得頂！呢度又係我可以收藏的好地方！
