鼎記 (Closed)

今日難得放假，黎到旺角行街買野，行到餓餓地，就想搵好耐無食過既燒味飯食。呢間鼎記好似都開左一排，但從來無食過，見到入面咁多人，我都排埋一份！雖然係食中式燒味車仔面粥品，但裝潢絕不輸蝕。呢到車仔面、粥、燒味飯都齊全。我就叫左個燒味三拼飯，燒腩仔、燒鴨、頭抽豉油雞脾。份量好足，有時出面食既雙拼三拼，份量係等同單拼，不過就有兩款燒味，價錢就收足，相當呃秤。呢到就份份咁多，絕無欺詐。而且調味料亦上足：油雞配蔥油、燒腩仔配芥辣、燒鴨配酸梅醬，是但少左一樣就等於食炸雞唔食雞皮、食pizza唔食餅底，咁同一條無靈魂、無夢想既咸魚有咩分別！？有啲餐廳叫佢比酸梅醬夠膽死收我錢！呢啲應該唔洗講都一定要有！講返啲燒味，燒腩仔皮好脆，而且件件都係半肥瘦，唔會話有幾舊淨係得脂肪，見到都唔開胃。腩仔亦唔會太咸，唔會話食完好口渴要狂灌水。油雞好嫩滑唔會老，亦無見血色，食落安心又放心。叫燒味仲會送碗中湯，飲落唔飲味精。另外想講既係佢地餐具好有特色，大家見到呢隻公雞有無啲懷念呢?最後埋單87蚊，食一餐燒味價錢唔算好平，但我覺得以呢個份量同質素黎講，絕對合理，唔信大家去試下就知！