Infinity Workshop Cafe (Closed)

第二次嚟呢度，估唔到食物質素更上一層樓，大大推介！蜜糖雞翼好juicy，帶甜甜既蜜味，勁正！德國腸拼野菌雜薈好特別，有唔同種類既菇菌，吸收左德國腸既肉香，調味方面，辣勁都幾重，食落又香又辣好惹味！All day breakfast 份量十足，最愛滑滑既炒蛋。仲包左個細細既蘋果酥。黑松露帶子虎蝦意粉望相就知幾足料。難得意粉唔過淋，煙煙韌韌，有香濃既松露味，帶子同蝦煮到剛熟好鮮味，完美。肉碎番茄意粉相對普通少少，但番茄味濃郁到不得了，愛茄之人一定鍾意。飽到撐都要食甜品，點左個心太軟。由於坊間太多難食既心太軟，亦知要做得好並唔易，冇抱太大期望。點知一試...amazing! 竟然系鬆脆既感覺，唔會死實似蛋糕，朱古力漿又唔會水水的，濃度剛好，雪糕用上Haagen daz出品...宜家諗返都想食...總括，食物份量大質素高，環境又靚啱哂傾計，一定一定會再嚟！