Freshness Burger (Closed)

有日同朋友行過皇室堡，見到依間新快餐廳未試過，於是抱著一試無妨嘅態度去幫襯下。其實一見個餐牌已經有啲想縮沙，因為價錢絕對唔平，而且選擇亦唔多。本來我想食洋葱圈同飲梳打，但偏偏依兩樣嘢套餐都無，於是退而求其次揀咗個最平嘅熱狗餐。嘢食嚟到已經好失望，條熱狗嘅腸同包都唔啱比例，啲配菜既唔好食又跌晒出嚟，行過對面宜家小食部嘅熱狗都做得好過佢，但係人哋足足平佢幾倍！朋友叫咗個最平嘅飽嚟試，睇佢嘅表情我諗佢都係寧願幫襯老麥。跟餐可以揀薯條或者薯格，但兩者分別不大，食落都係覺得好口乾，我哋最後都哽唔晒佢哋。講返環境同服務，地方其實有啲逼，基本上一定要搭枱，而且座位不見得舒適。服務其實同一般快餐廳無乜分別，雖然話即叫即整，但睇唔出對食物質素有太大嘅幫助。加上佢係日式連鎖，印象分再減多兩分。簡單嚟講，俾Triple O嘅價錢但換來比麥記差嘅質素，一句講晒就係唔值。但我最唔明嘅仲係好多人講到佢哋好好咁，尤其係一啲OL更加係稱讚有加，唔通佢哋覺得日本嘢就一定好？