左麟右李粥麵小菜專門店 (Closed)

一場去到黄埔，一於去左麟右李“潮“拜吓先。室內裝修欣賞唔到，因為被安排坐喺商場走廊臨時加枱。雖然粥麵檔食物來來去去嗰幾款，但唔知點解望落個餐牌硬係覺得佢哋可能有參考過正斗。價錢平啲街坊啲，質素要求自然要調整啲啲。鲮魚餅香口但偏油腻。肉丸粥粥底好綿，但肉丸唔夠正斗鮮味，同埋似乎比較細粒。理解正宗雲吞唔應該太大粒，不過呢度雲吞麵啲雲吞都係細粒咗些少，麵就不過不失啦。四式腸粉最正係叉燒，包咗腸粉蒸過都夠香口！蝦同帶子都算爽口彈牙，但牛肉就味道古怪兼似喺牛肉度溝咗好多嘢，冇牛肉味同質感！腸粉蒸得唔錯，唔會淋pat pat，豉油亦係暖嘅！杏仁茶湯圓嘅湯圓唔錯，杏仁茶味道ok但稀到似水。服務質素普通，唔算殷勤，唔知係咪走廊位顧唔到咁多...感覺係質素唔差但有啲將貨就價，人流旺似乎主要係選址成功，因為附近好似冇第二間比較四正嘅粥麵店。開分店就要喺食物質素同服務再下功夫，除非佢打算店如其名淨係諗住開喺啲招呼左鄰右里嘅地方例如領匯商場啦。