熱血一流 (Closed)

話說之前一日去搵fd，路過見倒呢間自私邊爐放題幾過癮，雖然見倒唔少人話間嘢麻麻，不過橫掂第二日得閒，就用試伏嘅心情走去試試。叫咗咗$58嗰個午餐(唔係最平嗰個)，但份量都超少。生菜三條，黃牙白三條，紅芯蘿蔔兩薄片，南瓜兩片，鮮冬菇一隻，金菇大約1/4包，粟米有吋半不過得半邊。如果唔計份量問題，啲菜新鮮嘅。米線就勁離譜，煮完得嗰細半碗，用嚟裝蔥嗰個兜仔居然可以裝倒大半米線，一口牛我就聽過啫，一口米線係咩玩法牛嘅份量同吉家差唔多，叫做正常啲。味道唔錯嘅。另外有得揀烏龍茶係幾好嘅。湯底冇之前啲食評咁陰公冇得揀，不過叫咗個喇沙湯底，無啦啦變咗有少少椰子味同香草味嘅酸辣湯。明明正常喇沙湯底應該有蝦味，佢呢個我食唔出。再講個湯底係完全冇湯料喺入面，話佢係師傅湯都唔出奇。另外啲豉油真係好鬼似大陸啲壽司豉油，同埋加蔥都要兩蚊，姑寒最後加咗一要$66先出倒門口，但我呢啲女仔食量只係半飽。我真係唔知男仔點食得飽喇。埋單仲要見倒張單上面有句『拳四郎：「你已經飽了。」』，我真係當場想做拳四郎嘅親戚拳四飛結論係，呢個價位同份量，我要食自私邊爐嘅不如番吉家食算喇。真係想食邊爐放題嘅，搵fd去其他邊爐放題冇咁嬲啦。