有囍 (Closed)

有留意我哋A姐M佬都知，我哋最鍾意就係打邊爐，一個星期打足7日就唔得，但打足6日都真係無咩問題，因為有個黑洞胃M佬同牛肉系A姐，但係新加坡式嘅打邊爐真係未試過，今日就去到太子嘅有囍試試啦！呢間餐廳光猛企理，又坐得舒服，最重要係一入嚟已經聞到藥材味重嘅肉骨茶啦。肉骨茶湯底講明新加坡式嘅打邊爐，所以湯底都要有啲獅城感覺啦，除咗有喇沙湯底，仲有楜椒味版肉骨茶，而我哋就重口味啲，揀咗藥材味版肉骨茶！上枱一刻已經聞到個肉骨茶藥味好濃，我哋都未開始打邊爐，個湯已經俾我哋飲咗一半，好彩加湯係用番肉骨茶，唔係普通清湯，我哋又可以再飲過喇。招牌手切本地肥牛呢個肥牛嘅脂肪比例較多，但食落又唔算好肥，仲幾有咬口添。脆鯇魚腩呢個係M佬必食推介，啲鯇魚腩真係好脆，肉質好彈牙，唔腥又新鮮！不過，打鱗打得唔乾淨，食嘅時候要留意。自家手包雲吞我A姐就大愛呢個雲吞，粒粒都有半個拳頭咁大隻，入面嘅餡一啲都唔少，有2大隻蝦，好彈牙呀！除此之外，我哋仲食咗脆炸響鈴卷、鮮肉青同油麥菜，樣樣都夠晒新鮮！唯一嘅小提議係店員較生手，隔離枱同我哋都不時要追單。