饑落亭 (Closed)

以前陳根記已經經常幫襯，搬新店後一直未有機會光臨，難得這次同友人行山後到訪，百般滋味在心頭。衛生環境感覺上比以前更理想，店內光猛，舒服。依舊顧客自行落單，有個性呢點無變。食物份量依然大大份，最可惜無左炸蠔餅。招牌菜Wasabi手撕雞愈食愈過癮，友人個個食到淚水流。麻醬粉皮夠滑夠香，清碟底。頭盤滷水豬展點醋，食過番尋味。楊洲炒飯一聞已經知道夠鑊氣。西檸雞多汁香滑夠開胃。咕嚕肉有咖喱味預先調味，估唔到甘夾。椒鹽魷魚有炭燒味，食到舔舔脷，椒鹽九肚魚比下去。黃金豆腐充滿蛋黃醬配白飯一流。不過對於食開清淡嘅人黎講算比較偏鹹同重口味，食完會口乾，最好衡量下先去食，我覺得一次半次還可以，多人食可以食多啲餸。我哋叫11樣，晚市每人$160，抵。