漢興茶檔

Open Now

Now Closed

喺閒日放假，加上食到「時間限定」的美食，絕對係雙重幸福。一心一意嚟食蛋鹹牛肉加多士，店員提醒食物製作需時，要耐心等候。左望右望，除咗呢款多士，好多人都食緊公仔麵跟豬扒雞翼。凍奶茶搶先上枱，茶色深而味濃，唔會越飲越啖。主角個賣相真係好可愛，充滿藝術風，大廚將蛋鹹牛變成圓碌碌漢堡扒，而且相當厚身。呢塊厚切蛋牛扒入口即溶，但又會食到少少質感，惹味得嚟唔過鹹，配埋三角多士一齊食最正。飛邊多士烘得外脆內軟，見到搽咗勁多牛油係有窒一窒架，反正個人都肥晒，食咗先算。任性的代價係肚滿腸肥，不過會大滿足。呢種幸福感同上次喺桂林街食蛋牛治，真係兩個世界。講返轉頭，呢份蛋牛多士屬「時間限定」，因為舖頭只係開周一至周五，下午三時就收工。好羨慕附近的街坊呢！