黑木 (Closed)

工作了一整天，終於下班，同朋友想搵個地方，食啲好野慰勞下自己，同埋搵個地方好好傾下計，所以就黎左呢到。 我地叫左個最多野食既廚師發辦。我集中講下有咩好值得一試燒紫薯仔 — 紫薯非常香甜～雞頸肉 — 燒得剛好，一口咬落去有新鮮既肉汁，再加小小檸檬酸中和一下！Nice ! 雞軟骨— 送酒一流！ 白鱔 — 新鮮，肉質嫩滑～溫泉蛋配免治雞肉脆串— 非常巧妙！係雞肉串入面自家加左啲雞軟骨，令口感多左層次 而且配埋溫泉蛋食 有多一種既口味。呢間幾令我驚喜，係其他地方都無見過咁巧妙既雞與雞軟骨。百香果慢煮黑豚肉— 呢個都一定要試試！黑豚肉慢煮後，啲肉汁鎖緊左係入面，雖然無左油去幫手，但係成個口感更加嫩，三成熟。海鮮茶碗湯—新鮮既海鮮原料係哂個茶碗入面，非常鮮味，再加小小檸檬🍋去提鮮，非常好飲。一個可以飲到差唔多6，7杯～ 最後不得不提既係師傅既用心同人情味。師傅不時同我地分享下，而且聽到我地做野咁忙，都叫我地飲多幾啖海鮮湯補補精力。而且環境非常優雅，適合傾下計 慢慢享受。