Mr. Right (Closed)

Mr.Right係一間位於元朗嘅西餐廳，地點唔算便利，但環境清幽，高尚且有情調，非常浪漫，岩晒d拍拖嘅情侶。餐廳主要食意大利菜，所以意粉及意大利飯嘅種類比普通西餐廳較多，而價錢中等，唔算太貴。我地叫左個意大利辣香腸薄餅，有大大塊辣肉腸，洋蔥，青椒，口感豐富，再加埋沙律菜，感覺清新。而味道同賣相一樣都好正，個餅底好鬆脆，芝士唔會太鹹，配埋個秘制醬汁，好似食緊日式燒餅。由於豬今晚好想食肉醬意粉，所以又order左個芝士焗肉醬意粉，一個圓形砌得靚靚嘅意大利粉放喺碟嘅中間，見到已經流口水。意粉麵條有彈力又有嚼勁，係先炒過，再加肉醬，所以唔會太濕。肉醬份量一d都唔不少，散發濃濃芝士香味。雖然只係簡簡單單嘅意粉，但熱烘烘，新鮮即做，即刻加左分 加左錢轉套餐，有南瓜湯及沙律菜，南瓜湯好香。服務普普通通，而衞生就真係多多注意呀，個水樽有污漬。如果咁靚嘅餐廳同埋唔錯嘅食物，配呢個service又真係浪費晒呀