富田和食亭 (翠屏北商場) (Closed)

上個星期六，係和樂村探朋友之後，一起行落樓梯，朋友推介呢間日本食店，見佢個鋪頭門面裝潢唔錯，便入去試下。老闆話最新推出了不同類型嘅一人晚餐，好抵食，而且一至日都有得食。我哋一人叫咗一個餐，價錢由50多蚊至108蚊，選擇好多，豐儉由人。我哋叫咗四個餐一齊食，一個係炭燒安格斯牛肩扒，一個係醬燒豚寸骨，呢兩個價錢好抵，一個76蚊，一個64蚊，配埋烏冬，啲烏冬非常之彈牙，食落好有口感，豚寸骨燒到好香，聞到都流哂口水，而個牛肩扒就夠瘦，又好有肉汁，啱我呢啲注重健康嘅人士。其他兩個，喺出面嘅日本食店唔經常食到，一個係拖羅蓉海膽丼，雖然價錢最貴，108蚊，但係物超所值，啲拖羅剁成蓉，配埋海膽，個樣有啲似鹹蛋肉餅飯，拖羅蓉撈埋飯同海膽，食落啲肉汁滲哂喺啲飯度，飯同魚嘅鮮味都出曬嚟，食完會上癮！下次嚟，都一定要再食！最後一個就係炭燒海鮮拼盤，睇個餐牌真係想像唔到係乜嚟，不過都即管一試，原來呢個最抵食，平時一個鯖魚套餐都要50幾蚊，而家78蚊有鯖魚, 虎蝦, 帆立貝和墨魚，仲燒得好好味添。