財記美食 (Closed)

其實呢間野轉左手之後都無入過黎，前身真係好麻麻啦。是晚好齊人想食餐飯，因為限聚令真係好耐無一班人一齊食飯啦，終於入左黎財記試下，我地都好守規矩分兩枱㗎，叫左啲餸就唯有夾開一半分去另一張枱啦。我都唔知叫左幾多個餸了，好似都有八、九個，仲加左個湯，又送白飯又送野飲咁，八個人埋單都係七百九十幾蚊，居然一人唔使一百蚊認真超值。因為好多餸都唔係我呢邊上枱，未影就夾左，所以呢只影啲完整版啦。魚香茄子煲好大兜下，鹹魚味香口，茄子走油好味噃，辣辣地送飯勁正囉。鹹魚蒸肉餅賣相一般啦，但個鹹魚靚野黎喎，超正，睇得出我地好鐘意點鹹魚嘅餸～薑蔥魚雲魚腩煲又係大大煲，勁入味，自己去街市買魚頭都唔平，抵食呀。最後呢兜係芫茜皮蛋魚頭湯，勁濃好好飲，飲完無口渴唔係師傅湯。仲左椒鹽九肚魚，黃金鮮魷，菠蘿生炒骨，腐乳蒸滑雞，馬拉盞通菜，八珍豆腐煲㗎，但無影相了。真心抵食喎，仲要個場好勁冷氣，夠涼真係好重要，尤其係夏天嘛～