金滿膳燒味餐室 (Closed)

今次我食嘅嘢真係普通到不得了，但我覺得都值得寫下食評，呢間牛頭角 金滿膳燒味餐室 唔可以錯過呀。🧇普普通通就嗌咗法式西多士，金金黃黃嘅外皮，熱辣辣嘅感覺，即食一定係最正。上面一個牛油等佢慢慢溶化後就剛剛好。一切開嗰下真係有好幸福嘅感覺，牛油又慢慢融落嚟，裏面夾心餡慢慢流出嚟真係好正。食一口真係覺得好溫暖，香軟充滿蛋漿嘅麵包再加上牛油，再加上夾心餡嗰種互相交融嘅感覺，鹹鹹甜甜咁樣好鬼正。🍜咁啱下午茶時間，就可以試下燒鵝髀配搭粉麵嘅套餐。燒鵝髀真係未試過咁正。除咗佢夠大隻之外，好食都係相當重要，皮脆肉滑，燒得剛剛好，每一啖都係香口，每一啖都係嫩口。