點鍋

Open Now

Now Closed

天氣一凍就想打邊爐，之前以為兆萬淨得放題，點知原來新開左間任食火鍋，星期一至四夜晚兩個鐘內食完仲有七折，就即刻約朋友一齊嚟試新野。本來Book左三人位，有朋友知道之後想跟機，我當日先臨時加人，店舖都好好咁立即調整，仲道歉講返可能會逼少少，態度非常好。我地揀左蟲草花雞湯底，唔洗額外加錢，另外每枱都會送一碟頂級牛頸脊同海鮮拼盤，而其他食品就可以用平板電腦散叫。呢度係無肥牛叫，淨得滑牛肉，相對無咁肥。掛住食唔記得影相，呢度有好多特別嘅選項，個人非常推薦黑毛豬腩片，Encore左好多次。另外黑松露蝦蟹餃等都好特別，朋友就大讚貢丸、鴨血好食，紫菜響鈴、金沙咸蛋炸魚皮都好香口。飲品有晒三款解茶，朋友都好驚訝。特別一提呢間店舖嘅員工有部份扣住襟章，係聽力有障礙人士，如果有特別需求想搵人幫手，可能就要搵返聽力無問題嘅員工溝通。最後我地食得太開心，過左兩個鐘少少先埋單，本來都預左無折，點知最後店舖都比返折我地，真係非常多謝佢地。食到咁飽都係平均每人$250，下次一定會推薦朋友再食。