潮丸 (Closed)

上個星期我出咗成個星期Trip，A姐就孤獨咁過咗一星期（我諗係，除非唔係），今日就輪到佢去咗荃灣同好姊妹傾心事，唔同我食飯！好叻咩！你識去荃灣，我都識去筲箕灣啦！筲箕灣東大街咁多好嘢食，今日就去潮丸簡簡單單食碗一啲都唔簡單嘅牛河啦。牛三鮮米線牛三鮮姐係牛腩、牛筋同牛肚。我就最鍾意牛肚，因為索晒牛汁以夠腍；而牛筋就好有咬口，仲有啲膠口，好似有好多骨膠源咁呀；至於牛腩唔肥，仲好香牛味呀。最值得一讚嘅係，餐廳好細心將冬菜、蔥同莞茜分開上，想落幾多隨你喜歡，但如果牛同米線嘅份量可以多啲就好喇。食麵又點可以無辣椒油，呢度就三款，最辣嘅係黃燈籠辣椒醬，最好味又夠香嘅就係廚師自製自炒嘅辣椒油。