Agura東京ラーメン (Closed)

星期一晚上尖沙咀搵食，周圍都好似冷冷清清，行到金巴利街附近，突然想食拉麵，想起agura. 唔駛等位，店內亦只有3個人，店員殷切招待我地坐，並介紹menu. 我地揀左細麵（魚介豬骨湯 / 魚介醬油湯）各一，另外叫多一隻半熟蛋share. 店員細心地問駛唔駛分開每碗比半隻，細心到即刻加晒分。當晚都幾凍吓，店員不時為我地添加熱茶，抵讚。至於食物，當然好ok啦。 湯底是拉麵的靈魂，因此每次吃拉麵時都例必先喝一口湯，自然就知拉麵的質素高低。而本人一向是濃厚豬骨湯的粉絲，愈濃味愈美味，但弊處是其後往往口渴大發，要大量灌水！不過依度嘅魚介豬骨湯拉麵，味道夠濃之餘又不至重口味。魚介湯其實煮法幾複雜，用唔同種類嘅魚乾，例如鯖魚和沙甸魚介等，連同豬骨、雞骨及蔬菜熬上十小時，其後再把濃湯冷凍成啫喱狀，收到柯打後再翻熱，保證每碗的味道相同。佢嘅魚介豬骨湯質地非常薄，一入口先甜後濃，味道豐富，做到濃、香、鮮味兼備。拉麵配料有秘製的薄身叉燒，入口即融，美味！仲有半熟蛋，糖心一流。