翠苑餐廳小廚 (Closed)

今日去大角咀食飯，見有啲凍就入咗翠苑小廚餐廳食雙冬羊腩煲，同埋"一人一鍋"火鍋，揀咗龍蝦海鮮拼盤打埋邊爐， 有半隻超大嘅波士頓龍蝦，入面超多膏，隻龍蝦超鮮甜，另外仲有扇貝、青口、蜆肉、魷魚，超多海鮮仲有津白同埋公仔麵 ，個餐都唔使一百蚊超抵食，而且個湯底超有海鮮味， 淥出嚟嘅公仔麵係非一般嘅公仔麵。 雙冬羊腩煲入面超多羊肉，半肥瘦唔會話太肥或太瘦，個羊腩煲嘅汁好濃，淥生菜食時索埋啲汁又係好好味，而佢哋秘製嘅腐乳醬點埋羊肉食，食到個人暖笠笠，冬天都唔怕凍。 飯後仲有椰汁西米露糖水送添。正！其實呢度仲有好多中式小菜、粉麵、雞煲、烤魚、酸辣魚、焗龍蝦、牛腩牛雜、同埋招牌鹵水食品，真係好多選擇，如果下次離開大角咀我會再嚟呢度食。