上海真美豆漿大王

Open Now

Now Closed

將軍澳區大部分都係連鎖商場，甚少有小店，而呢間起碼開咗廿年既小店，仍然可以喺貴租之下屹立不倒， 除咗價錢平之外，舊式平民小店嘅感覺都係好吸引，佢嘅裝修雖然冇特別，而且可以講得上係殘舊，但係就好似返咗廿年前咁。下午茶時間，嗌咗一碗油豆腐上海麵，麵唔算好大碗， 有三粒油豆腐，即係豆卜， 但入面釀咗菜肉碎， 非常索湯。 同埋有啲鹵肉碎、炸菜同蔥，成碗麵就甜甜哋，但係個湯底就好清，係簡單嘅家庭式小麵。鹹豆漿就比較少見，有油炸鬼，蝦米仔，蔥花，菜莆粒， 其實唔太鹹，反而係香，加咗配料之後，碗豆漿比較傑身，暖胃又飽肚，同埋豆漿好有豆味， 食完成個人暖曬，好舒服。不過鹹豆漿比一般豆漿要加六蚊，但都係抵嘅，話曬都足料，埋單三十六蚊，算係咁啦。 如果想慳啲嘅話普通一碗麵配熱豆漿，其實只係三十，而我就貪心想飲鹹豆漿， 不過值得一試。