港里冰廳 (廟街)

Open Now

Now Closed

晚市，時間八點多，理應人潮如沸。就係唔想等，所以先稍移玉步黎到呢間門可羅雀嘅“港里冰廳”。餐廳內只坐住三枱客，唉！已知中伏，心知不妙。就點個唔會點死得人嘅“海南雞油飯”啦。侍應叔叔送到嚟，竟然係碟「柴皮海南雞［白］飯」。當下禮貌地問：“唔係油飯咩？”侍應叔叔應該輸左波，嘆住氣咁話：“依家幾點啦，邊度仲有油飯，白飯，你要唔要呀？！” “收到，唔該晒師傅！”於是，開始我嘅艱苦食程。碟上面嘅海南雞應該真係由海南島坐船黎，因為佢好老、好柴、好乾。佢冇兩歲，都應該有23個月大。呢種老雞最適宜攞嚟燉湯畀老媽子或者屋企產後嘅孕婦。老闆肯定大手入左批老雞，攞黎拖拖水，咁就既可以煲啖湯畀產後嘅二奶飲，又可以斬咗啲雞拎出嚟賣，一舉兩得，真係曠世奇才。好！雞唔得，我就食你啖白飯！！！不過，正所謂：“食碗面，反碗底，呢啖白飯係三夾底！”我條命已經夠硬，但都敵唔過口中呢擔“硬米”。我份人就好正面嘅，上天一定見我呢排肥咗唔少，就藉住呢餐等我谷住道氣，係冇飯落肚嘅情況下乘機可以瘦返兩磅。為我嘅人生下半場注入唔少動力。多謝，多謝“港里”！