PizzaExpress (V City) (Closed)

今次嚟到屯門vcity嘅pizzaexpress，環境唔錯，用咗淺藍色做餐廳嘅主題，感覺都幾fresh，都幾適合朋友聚會同埋情侶嚟食飯。意式焗肉丸。呢個肉丸都唔錯嘅，伴著茄汁咁食，而且入面都幾有肉汁，再加上特別嘅係有個小麵包包住粒肉丸嚟食，麵包都係鬆脆可口。海鮮披薩。呢個披薩同我認知中嘅披薩唔係好同，成個都係白色嘅，雖然材料好充足，有蝦有蜆有青口有魷魚，但唔知點解食落個滿足感欠奉，你當係好似食緊個冇架哩汁嘅印度薄餅，上面再放啲海鮮噉樣，我就麻麻地呢個披薩喇。北京填鴨披薩。呢個非常之推薦。有時候食fusion菜如果整得唔好都幾災難性嘅，尤其是好似披薩同北京烤鴨噉樣，就噉睇好似大纜都扯唔埋。不過佢哋嘅味道又出奇地匹配。北京烤鴨食落好香，再配上一啲燒烤醬，薑蔥同埋青瓜粒，感覺就完全食緊北京填鴨噉樣，不過係以披薩嘅形式上碟，我對呢味菜非常滿意。總括而言，北京烤鴨披薩好食，環境又企理，係一間可以encore嘅餐廳。