Häagen-Dazs

Open Now

Now Closed

好耐冇食過雪糕火鍋，新一年放緃下先！堂食雪糕火鍋迷你餐$298有16粒8隻味，包括: 2球抹茶、2球呍呢嗱、2球士多啤梨、2球焦糖脆餅、 2球曲奇呍呢嗱、 2球藍莓、 2球比利時朱古力、 2球芒果紅桑子，仲有精緻日式糕點大福餅、黃豆粉蕨餅及綠茶粉蕨餅，配埋時令水果及杏仁碎。我哋仲加$30叫咗兩杯熱蜜桃茶🥰講真，去得Häagen-Dazs食佢fondue，就係為咗個朱古力醬。朱古力醬一如以往好味，出奇地同抹茶、呍呢嗱、藍莓、芒果紅桑子好夾。喺朱古力醬未凝固晒之前加啲花生，三重享受！ 黃豆粉蕨餅同綠茶粉蕨餅都係雪凍咗，試過蘸朱古力醬但完全唔夾，反而就咁食都唔錯。黃豆粉好濃﹑綠茶粉甘甜，不過同成個set唔太夾。大福餅入面係豆蓉餡，味道偏甜，唔太吸引。熱蜜桃茶係神來之筆，酸酸甜甜，可以化解雪糕同朱古力醬油膩感，雖然只係茶包加蜜桃糖漿，但食完咁多凍嘢落肚，呢一刻飲杯熱茶，舒服晒。