沙嗲王 (Closed)

呢日早收工去接ot既女朋友去食飯～十點幾好多旺角餐廳都收曬鋪，所以女朋友就帶我去食佢由佢學生時期已經好鍾意食嘅餐廳-沙爹王。咁一坐低見到個餐牌之後呢就見到有啲二人餐啦，其實睇落都幾抵食，但係到咁既鐘數又唔係真係非常肚餓，所以呢就叫咗一個女朋友最推薦嘅白咖喱香茅豬扒配白飯同埋同埋都係餐牌上邊推薦嘅蟹粉豆腐鍋飯。咁首先嚟到嘅係白咖喱香茅豬扒飯，豬扒上面有啲乾蒜片同洋蔥點綴，而豬扒下面就係濃郁既白咖哩汁，首先我想稱讚既係佢既白咖哩汁真係好岩送飯食，味道濃得黎唔會令人好口渴，豬扒加埋呢個汁簡直一絕，難怪會成為呢到既招牌菜！而無耐蟹粉豆腐鍋飯亦都上枱，熱辣辣嘅石鍋載着熱辣辣嘅豆腐同蟹肉，觀感好吸引，味道好重咸蛋黃味，又係一樣送飯一流既食物，另外一提呢樣食品都係沙爹王頭十位受歡迎既食品呢！如果下次再遲收工既話，呢到都不失為一個食飯好地方呢！