燒鳥 (Closed)

近排深居簡出，冇乜點出街食飯。適逢西人鬼節，諗住出街玩下，行經亞士厘道一帶酒吧果陣，居然俾呢間小小燒鳥舖仔o既香味引o左入去。呢度舖位好細，頂多坐到十零廿人。地方好「up dup」，地下仲有幾灘水漬冇人處理~~成間舖只得一個人做o野，原來佢係個只識講少少廣東話o既日本人，廚司，執檯，洗碗一腳踢，做到滿頭大汗！講番D食物先。呢度好似日本街頭o既燒鳥店咁，主要都係食yakitori，價錢大約$8至$1x一串。我地叫下叫下，唔經唔覺就食o左餃子雞翼，雞翼串，雞頸肉，豬頸肉，多春魚，牛肉露筍，冬菰等等。燒鳥味道唔錯，可以揀汁燒、鹽燒、或味噌燒；個人偏愛鹽燒，始終比較原汁原味；味噌燒味道有D似海鮮醬，麻麻地。另外仲叫o左冷豆腐，滑一滑，味道唔錯。仲食o左個野菜拉麵，湯底味道好怪，拉麵又好難食，差~~Service方面，日本人其實幾有禮貌；但只得一個人做o野實在唔係好掂，漏單之餘，執檯果陣仲倒瀉D湯落我男友條褲度~~唉，唔該快D請番個人幫下手啦！！