天山小館 (Closed)

雖然唔係成日食新疆菜，但係呢一間嘅手工拌麵係我暫時食過最好食嘅！ 所以一定要寫食評，大力推介，等多啲人都認識同埋欣賞呢間餐廳嘅招牌菜！首先一入去間餐廳，老闆娘已經好熱情咁招待，我見menu裏邊有四川菜，新疆菜，廣東菜等唔同選擇，佢就推介咗幾款... 但係因為本身唔太食羊，所以就試下佢嘅手工拌麵，另外仲叫咗個重慶雞煲同埋士多啤梨骨...老實講menu本身幅相嘅新疆手工拌麵睇落唔太吸引，但係到咗一上菜，份量好大，而且上面好多牛肉，非常足料！一食落去嘅時候好有驚喜，因為老闆娘話個麵係即叫即拉，面質非常彈牙，個味有少少辣，牛肉好淋，好香， 越食越開胃，大力推薦大家點呢一個菜！至於雞煲亦都非常足料，個味好香，配白飯食就一流！雞肉夠實而唔鞋口... 至於士多啤梨骨就屬於中上，冇話太大驚喜，不過都算係色香味俱全，一上枱嘅時候就已經聞到 士多啤梨嘅香味！雖然天山小館嘅價錢唔算話好平，每碟都大概一百蚊左右，但係佢嘅份量好足料，好適合幾個人嗌餸食飯！另外值得一提嘅係佢地請咗聽障人士做侍應，所以下次會再嚟試下其他菜式，亦都支持下呢一間餐廳，非常之有心！