爆丼屋 (Moved) New Location

以前去日本一路都好想試下爆丼🍚，不過一直無機會，今日無啦啦有個朋友提議去食爆丼，話旺角豉油街專有一間食爆丼，我二話不說就話去啦。 去到全店都爆滿呀，好多人食爆丼呀，呢度個天花啲燈仲切咗個丼字添，好有心思呀🥰。 有好多款爆丼都好吸引好想揀，心大心細，最後我揀咗鵝肝海鮮盛丼，因為有我至愛嘅帆立貝，仲要有好多粒呀，心心眼😍😍！粒粒都好新鮮鮮甜， 口質扎實。仲有鵝肝、海膽、黑魚籽、蟹籽，真係好豐富🤤🤤！蟹籽咬落爽脆，加埋個蛋黃同鮮甜黑魚籽，撈落啲飯度食「鮮」味無窮！ 朋友因為唔食得生嘢，點咗個重量級燒牛扒盛丼，啲燒牛肉堆到好似座山咁高🏔，牛肉燒得好香，面頭亦有芝麻香，牛肉肉質嫩滑，帶有少少脂肪香，配合埋燒汁一齊食非常美味。 食日本嘢當然要飲番個麵豉湯先圓滿啦，個湯有豆腐卜同甘筍，令口感更豐富。 粒粒白桃肉白桃汁🍑好香蜜桃味，仲有好多果肉；而粒粒香梨汁🍐同樣有果肉，感覺好清甜。