梅光軒 (登龍街) (Closed)

今日有事要岀銅鑼灣，就順便嚟好耐冇食嘅梅光軒支持下。星期六下晝嚟等咗一陣，佢有套餐連小食同嘢飲，價錢好似同就咁叫一碗麵一樣，我哋叫咗一個醬油炙燒五花肉拉麵，一個醬油雙叉燒拉麵，餃子同忌廉蟹餅，嘢飲就揀咗可樂同加錢叫咗支啤酒。佢嘅湯底唔係好濃好杰嗰種，飲埋湯都唔覺得好漏，拉麵係我鍾意嘅曲麵，炙燒五花肉燒過特別香，同埋佢嘅五花肉唔太肥唔會就層肥肉咁，但又好鬆化，唯一缺點係咸咗啲，輕手返啲會好啲。整體質素唔錯，價錢嚟計相當抵食，而埋單先知原來呢間店租約期滿，係最後一日營業，會繼續支持。