HON10 (Closed)

星期六嘅中午，金鐘太古廣場試吓呢間日本料理，店內空間感十足，環境清幽，唔會太嘈雜，可以慢慢享受午餐呀睇吓餐牌，價錢都有平有貴，豐儉由人，但午市都咁少人嘅。先叫杯柚子酒$88解喝先，日本果酒真係好香，好易入口，所以飲得多好易醉，揸車就唔好飲呀。點咗5款刺身$348，魚肉冇雪味，又唔係啱啱喺雪櫃攞出嚟仲凍凍地，而係溶好晒雪喺室溫嘅溫度，食落水未至於入口即溶，但魚嘅香甜都一一感受得到。大蝦野菜天婦羅$128，我對天婦羅冇咩興趣，但呢個天婦羅粉漿啱啱好，唔會一咬落去就甩過晒，蝦又新鮮，有彈性，又甜。本店雜錦魚生飯$258，魚生真係好好味，飯上面仲有海膽，好甜好正呀，大蝦都係啫，其實一個人自己嚟食碗飯，加杯威士忌都夠。蒲燒鰻魚飯，鰻魚肥美，燒汁又正，呢個飯又係可以自己一個嚟食，再加杯清酒。兩個人唔算大食，但係兩碗飯都食唔晒，下次唔好叫咁多物先得呀。