Ben哥米線 (Closed)

餐廳位於新蒲崗大有街，店舖面積都幾大，但座位之間就比較狹窄。正值lunch time，人流非常旺，好彩我一個人入座，唔使點等位。Lunch time $40 有三款餸，我另外加$2要咗酸辣湯底，加埋飲品承惠$47。酸辣湯底有得選擇辣度，而我就揀咗少少辣。加埋芫荽，蔥等等配菜，湯底係幾香既，但係酸味就唔夠濃，或者比辣味遮蓋咗。三款餸包括炸醬，蘿蔔同雞肉。當中我最鍾意就係炸醬，佢唔似譚仔咁成pat野，佢係粒粒分明嘅肉碎，配米線好好食！而我亦都好鍾意雞肉，雞肉非常嫩滑，蘿蔔就冇咩特別。個人覺得呢一間米線店唔算特別平，但好食過譚仔👍🏻👍🏻如果行開附近都可以試吓。