水記

Open Now

Now Closed

作為大西北人，平時食開屯門紅橋某間舊式粉麵店，食過果間之後好少再搵到其他店舖取代，更加唔洗講起港島搵到一間食完會回頭嘅牛腩麵。前排睇youtube見到有人介紹水記，見到佢嘅製作方法同埋故事之後，趁今日假期就即刻過海嚟港島一試，上網睇話11:30開門，諗住差唔多夠鐘先去到，點知11:25已經坐滿人，好睇仲有二人位，但個環境真係好懷舊，食食樓上會滴水，張枱櫈就非常斜嘅，不過嘢好食就得。今次叫咗一個爽腩河一個牛雜河，爽腩非常入味同淋，絕對唔係其他人講嘅柴口或無味，同我屯門食果間有得比，但屯門果間好難食到爽腩，因為好早就賣晒，呢度就仲有得食👍 牛雜方面我本身唔係好識食，亦唔算好鍾意食，但呢度一啲都唔腥，好入味，都可以一試，特別一提佢嘅湯好清甜，非常好食。另外我亦叫咗一份魚皮，佢係連骨炸嘅，亦係我食過數一數二最好食嘅炸魚皮，非常推薦。我仲叫咗一枝菊花茶，個人就嘛嘛哋，因為係好甘苦嘅，感覺好清熱解毒，如果飲開苦茶嘅應該鍾意。