華香園

Open Now

Now Closed

熟食中心要裝修，之前同老闆傾偈話都要裝修好耐，後來因為疫情關係都少咗出街，到最近先知熟食中心開返。即刻要嚟呢度食，勁掛住佢哋嘅味道。個個都話呢度豬扒出名，但我由以前開始都係最鍾意食佢哋嘅雞翼，所以今次返嚟食我都係照叫咗雞翼飯。味道同以前一樣，好好食，老闆仲認得我話次次嚟親都食雞翼我估因為以前去食嘅時候，通常都係下午茶時間，人流比較少，所以老闆有印象。唔飲得奶茶關係，冇叫到奶茶。呢度人情味依舊，老闆得閒就過嚟吹兩句，喺呢啲地方食嘢，除咗好味之外就係呢份人情味！依家知道開返，我得閒就會過嚟再食㗎啦！