王林記潮州魚蛋粉麵

Open Now

Now Closed

東大街兩間魚蛋粉都好多人幫襯，我自己就鍾意食王林記。主要係因為鍾意食佢獨有嘅香蔥魚蛋，第二度食唔到。星期六一點幾嚟到等咗十五分鐘先有位。點咗一個香蔥魚蛋切腩撈粗，一個魚片頭香蔥魚蛋河，一份鮮油奶多士。鮮油奶多好快就上枱，多士可以揀厚定薄。厚多士係放牛油喺面賣相靚啲，所以揀咗厚。多士烘至金黃色剛剛好，少少脆唔會乾，牛油夠凍唔會好快就溶，配埋煉奶真係好食到不得了！香蔥魚蛋切腩撈粗都好大碟下，撈粗麵豉油味好香但唔會太咸，麵質爽口，雖然有少少梘水味但屬可接受程度。配菜芽菜同豉油王撈麵好夾。切腩有六舊，瘦得嚟唔鞋，更加唔會乾，唔使驚食到癡牙。香蔥魚蛋係放湯另上，一共有三粒，魚蛋爽口彈牙有魚味，一啲都唔腥。魚蛋入面加咗蔥好特別而且好好味，係喺其他餐廳食唔到嘅味道。魚片頭香蔥魚蛋河上面嘅魚片頭呈金黃色，好吸引！比起白魚蛋，魚片頭炸過所以多咗一陣香味。口感方面就同魚蛋一樣咁彈牙。湯底清澈得嚟有魚嘅鮮味，河粉好滑唔易斷，份量就還好，以午餐嚟講都食得飽。除咗香蔥魚蛋同魚片頭，聽講墨魚丸都唔錯。但因為次次都食香蔥魚蛋同切腩撈粗，所以食咗幾次都仲未有機會食到墨丸，下次真係要試下。