潮味莊 (Closed)

近期來多了土瓜灣區，發覺區內有不少新食店，潮味莊便是其中一間。今晚我地特意來試試，叫了「三餸泡飯」、「蠔餅」、「牛雜」。三餸泡飯 - 「即叫即煲」吸引左我地想試下，揀左蠔仔、豬潤、冬菇，白飯另上。等左約15分鐘，滾熱辣上枱。試一試個湯，好香濃既豬潤味，試一片豬潤，屬爽囗類，不會太粉。蠔仔亦幾大隻，但蠔味唔重。冬菇索左豬潤湯汁，幾入味。湯內仲有生菜底，夠健康。先飲細半碗湯，再加點白飯變成泡飯，夏天冇咩胃口食呢個泡飯，唔錯唔錯！蠔餅 - 上枱見到個樣有d失望，試一啖，同樣失望。蠔餅煎得太鬆太碎，有d乾身。蠔仔正如泡飯一樣，無咩蠔味，而且份量亦唔多。牛雜 - 呢份牛雜都包含左好多部位，牛膀、牛肚、金錢肚、牛腸、牛肺＋喉、牛粉腸等。牛腸、牛肺＋喉都整得好爽口，牛粉腸更係少有食店會提供，兔仔不知幾鍾意 至於牛膀牛肚等就比較普通，整體而言已經唔錯。後話：返到屋企冇口乾感覺，相信店內食物冇咩味精