壽司正 (Closed)

星期一我哋表姊妹行街行到九點幾先食飯，原本表妹諗住平食金馬倫道半價壽司，但條人龍長到入後巷，而且我之前有差d俾舊飯哽死的陰影，所以都係放棄。差d餓死街頭之際，發現百樂酒店隔離間壽司正都做緊優惠，又唔駛等咁耐，咪姑且試下囉。驟眼望落好似幾貴，但都叫咗好多嘢食：三昧鮭魚、鮭魚子軍艦、近海海膽(正！)、甜蝦、天婦羅蝦、吞拿魚赤身、珍珠蠔軍艦....等賣相工整有光澤，証明係即叫即做，唔會好似其他咁攞迴轉帶上面o個d俾你。鮭魚油脂分怖平均，三種口味可以分得清楚；近海海膽係佢哋先有，一定要試；蝦好爽，唔會霉晒唔新鮮；可能剛剛該日到貨，珍珠蠔好鮮甜，連我本身唔食蠔都愛上咗佢。壽司以傳統款式居多，沒有太多新潮口味，相信是希望以質素作賣點。埋單時出乎意料，只係食咗二百四十幾蚊，原來九點半後入座的人客於埋單時食滿三百蚊有得即刻減九十蚊。想食好味壽司原來唔一定要排幾個鐘o架！