康瑞涼茶 (Closed)

夜晚同老死食完飯慶祝佢升職之後，我地略嫌唔夠喉，所以就係附近搵左間糖水鋪 志在可以吹多陣水。康瑞甜品主打台式甜品，可以互配芋圓 地瓜圓同小丸子。選擇唔多，但價錢便宜。由於本人近排太熱氣既關係，理所當然地揀左綠豆沙配芋圓 地瓜圓 小丸子，綠豆要食幾多粒先下到火？成碗上！綠豆沙可以接受，勉強可以食到少量綠豆粒。但芋圓同地瓜圓就唔合格，煙韌但淡而無味，完全沒有芋頭、蕃薯既香。友人則揀左特色仙草百配三丸。厚面皮地偷試左一啖，味道偏甜，但可以睇得出用料頗足，集百家大成，同樣敗筆都係芋圓、地瓜圓。價錢定位平民，但借住台式糖水既名號卻做唔出台灣既味道，稍為有點可惜。