混亂拉麵 (Closed)

呢排都非常凍，又係時候食多啲好西儲存脂肪保暖，食拉麵啱曬，熱辣辣既湯麵非常保暖，又唔洗諗太多食咩好。混亂拉麵位於西九龍中心對面，對於九龍既朋友實在非常就腳，又係鴨記附近，平價美食之選。混亂拉麵屬於二郎系拉麵，用豬骨味噌湯底，非常濃厚既麻甩口味。貪心的人嗌左混亂玉子拉麵，加上三倍背脂同蒜蓉，兩倍野菜 (因為三倍真係食唔曬)，一上檯就見到堆到小山咁既拉麵，果然名乎其實既混亂拉麵，滿滿既芝士粉鋪面，底下係野菜小山丘，配上叉燒同玉子，大滿足湯底係豬骨味噌，加上三倍背脂，一個字，月巴。但係真係忍唔到口，湯底非常Rich 同creamy, 厚既程度好似飲緊忌廉湯咁，有少少漿口，而背脂就係肥膏粒，切到小小既方型，好好咬。而麵就選擇咗幼麵，比較掛湯，可以邊食麵邊吸啜啲湯入口。而野菜就係芽菜同椰菜洋蔥咁，師傅係鐵板炒過，充滿鐵板既焦香味。玉子就夠曬溏心，不過我鐘意再生少少，如果啲蛋汁會流出嚟更好。叉燒就厚薄適中，大大塊有兩件，滿足到食肉獸既胃口。