鐵牛台灣牛肉麵 (金巴利道) (Closed)

今日約左附近工作嘅朋友一齊食晏，喺佢推介下，黎左呢間鐵牛食台灣野。同普遍台式餐廳一樣，都係用點心紙剔野食。揀好野食之後就到櫃台畀錢，畀完錢就返埋位等上餐。1. 逢甲鹽酥雞滷肉便當我覺得成個便當個擺盤簡單得黎幾靚，一碗滷肉飯，三個伴碟，分別係滷水蛋配酸菜、娃娃菜炒胡蘿白絲 同埋 煮香菇，同埋一碟由台灣形狀嘅碟盛裝嘅鹽酥雞。份量方面都幾足料，食得飽先，雖然唔係話大大份，但至少唔係台式份量。味道方面正常發揮嘅台式味道，滷肉飯唔係好咸，肥瘦適中；伴碟都係以菜類為主，清清地，平衡番滷肉同鹽酥雞嘅肥膩感；鹽酥雞就炸得比較乾同脆，美中不足嘅係米糠比較多，感覺上食緊一口炸粉。整體黎講都算中規中矩。2. 熱蜂蜜檸檬其實即係熱檸蜜，蜜糖嘅比例幾好，甜度適中，加埋陣檸檬味，比普遍茶記好飲。呢間同普遍台式餐廳一樣，野飲另計，所以加錢飲呢杯熱檸蜜嘅話，個人覺得唔太抵。埋單每人65蚊，唔係話好抵食，不過可以一試，都算係有水準嘅台式出品。