My Burger (Closed)

新蒲崗嘅康強街同景福街都圍繞住一排排嘅食肆小店。之前夏天早餐時段（佢好似開8點）同朋友誤打誤撞入左嚟歎咗杯熱情果沙冰並吔個靚早沙就一試難忘，今次就一嘗夜晚嚟睇吓又會有咩新感受。餐牌上日夜變化不大，佢嘅意粉份量唔係一般茶餐廳嗰啲咁大堆頭大大碟，目測起碼少三分一，唔係巨食量係夠食，意粉有刻意剪短咗，唔知係咪見有細路在場。巴馬火腿煙三文魚白汁意粉食咗20分鐘都仲係燙口，火腿同三文魚幾夾，係三文魚份量略嫌少咗啲。溫泉蛋蕃茄肉醬意粉🍝啲汁都夠豐富。口多多叫多咗碟鬼馬薯條，碟頭等於三四人份，結果食唔完。次次點啲飲品顏值都好高，今次唔例外，以為跟餐轉咗熱飲會冇咁搶眼，一杯芝麻奶一杯紫薯奶都濃味到甜品水平，好飲到嫌唔夠大杯。左面排卡座真係幾方便傾偈，係幾適合三五知己聚腳。