人人和平小飯店 (Renamed) View

同屋企人兩個人食，分別嗌咗晚市套餐嘅燒味雙拼、琵琶豆腐、皮蛋一客。服務唔錯，佢啖茶值得一讚，唔係普通嘅普洱茶佢係帶啲陳皮味，我覺得比起一般小菜餐館呢一點解係優勝嘅。先講燒味雙拼飯，燒肉拼燒鵝。聽屋企人講佢嘅燒鵝出名，但係有對比之後覺得燒肉反而更加出色，超級脆皮唔會話太多肥膏而油膩，咬落去肉係鬆軟唔會實的的。 燒鵝正常，睇你要同咩舖頭比，個同好出名嘅燒鵝店比可能佢冇咁出色，但依然做到皮脆有鵝香。琵琶豆腐，原本見到menu上面寫要預訂，所以本身想叫鵝汁浸鵝肝，但係平日嘅晚上反而佢冇，一問之下發現原來今晚會做琵琶豆腐當然要試一試。外皮炸得香口，但係裏面依然嫩滑，個汁的調味亦好好，送飯好。皮蛋裏面有啲流心，本身我唔係特別好皮蛋，至少我放落口佢冇嗰陣可怕嘅石油味。據屋企人話皮蛋都唔錯。呢間餐廳我會encore, 會同屋企人去試午市同晚飯，因為其他嘅小菜同埋佢砂鍋飯我都有興趣。