谷芋 (Closed)

今日篤完魚蛋，見對面有間門面勁少女既飲品店望下menu原來主打竽頭飲品~作為竽頭控既我梗係要試試，叫左兩杯飲品，分別係芋頭豆豆同芋泥櫻櫻西米露。芋頭豆豆可以揀豆奶或者牛奶~一層層好有層次，紫色係芋頭沙冰，豆豆係黃金珍珠，比起平時食既黑糖珍珠冇咁甜但都有煙韌度~另外仲可以選擇芋圓做底。飲品甜度都可以揀~我冇特別叫少甜但都唔會特別甜，店主話因為佢地主打健康，所以都唔會整得太甜!芋泥櫻櫻西米露呢杯一黎到咁pink嚇我一跳以為落左色素，但原來係火龍果汁溝奶形成櫻花色既效果，呢杯比芋頭豆豆更食到一粒粒既芋泥，而底下既西米露滑溜溜，成杯飲品順滑易入口，好似食緊一杯甜品咁~ 題外話~點完飲哈之後入左店內影下相涼下冷氣，見到有部夾公仔機店主見我地好奇就走黎同我地講係新諗既idea，買1杯飲品有兩分，1分就可以夾一次公仔，即係買一杯飲品就夾到兩次~有得玩又有得飲又幾好諗頭~講講下先知呢間鋪原來只係開左兩個星期，店主仲係個大學生，咁細個就咁勇於創業真係佩服佩服!