馬華餐廳 (Closed)

佐敦呢區有好多老字號既食店，平時肥柑子都會去試不同既老店，希望搵到一間可以長期幫襯既，今次幫襯呢間馬華餐廳。果日入到去比較肚餓，就叫左份茶餐，西多配司華力腸，餐到時發覺幾有驚喜。雖然賣相唔好，但睇到佢地炸塊西多係剛剛炸到淺金黃色就收手，有心機留意塊西多炸到剛好就上碟，咬入口皮脆內嫩，大大塊好填肚。而條腸先係一絕呀，好有心機去切開，再放入油鍋去炸，炸到脆脆地上碟，平時係出面食炸司華力腸，切幾刀既情況幾常見，但切十幾廿刀先囉去炸，將條腸炸到變海蔘咁，就真係絕無僅有。亦因為切得好，炸一陣上碟時，表面係脆既而入面就好熱，層皮唔燶之餘，仲脆脆地，一啖咬落去，咬到熱辣辣既肉到，感覺真係有少少似食海蔘。平平凡凡食一個茶餐，最後味道同功夫上都畀到驚喜我，真係值得再黎試過。