風流居酒屋 (Closed)

喺instagram見到風流居酒屋啲相賣相唔錯，終於有日經過大圍就去大圍村睇吓係咪真係咁得。一去到侍應都好有禮貌咁話地方唔夠，詢問我地搭檯mind唔mind，而我地都係旨在食，亦唔介意屈就，就乖乖地行咗上二樓。或者係本身住元朗，日本嘢太多選擇，打開餐牌，已經覺得冇乜驚喜，而且價錢亦唔算超值。因為本身係畀佢碗牛肉烏冬吸引到，就決定嗌一碗試先，而由於天婦羅都幾測試到一間日本餐廳嘅功架，什錦天婦羅亦都係非叫不可嘅。加埋個壽司盛、蔥吞拿魚卷同燒廣島蠔，唔係求飽，已經合共超過六百蚊。魚有魚味，但唔至於非常鮮，醋飯冇乜特色，食完唔會心思思。海膽形態保持到，唔苦，但亦唔鮮甜；星鰻連鎖店水平，略霉。牛肉烏冬同天婦羅都可以算抵食，前者豉油湯底幾甜，後者炸漿算薄，可惜蝦唔彈牙。最失望係個廣島蠔，都預咗係唔連殻嗰種急凍廣島蠔，但都比想像中苦澀。冇嗌酒水，人頭各三百，環境確實係cosy，或者一班朋友五六個人傾偈買個場係抵嘅。